درباره سایت
آخرین مطالب
امکانات وب
------- ئه دا -------
ئەد٘ا دەرمانی دڵەی بیمارم
ئەد٘ا یاگەی داد٘ چەنی هاوارم
ئەد٘ا گوڵخونچەی ئەوەڵ وەهارم
مایەی سەربەرزی و کەیف و دەمارم
ئەد٘ا وەنەوشە بوەو تۆش کەردێنە
بەڵام جە وێنەت ڕەنگەش بەردێنە
ئەد٘ا پەپوولەی ئاشق پەرێ شەم
هەرگیز من جە تۆ نمەمێڕیۆ تاسەم
جه دماو شوکرانەی خود٘ای لایەنام
ئێتاعەی ئەمرت واجبەن جە لام
بە وەشی تۆوە وەهار خێزیۆ
لەعنەتش بۆنە هەر کەس کە تۆش بێزیۆ
ئەد٘ا چێش واچوو جە وەسفت ئاخر
زوان پەی وەسفت لاڵەن و قاسر
کێ تاوۆ بارۆ نموونه و وێنەت
یا کەرۆ تاریف ئەشقی بێ وێنەت؟
ئەر عەرز و ئاسمان گرد بوان کاغەز
کۆ کریۆ تەمام جەوهەری سەر عەرز
هەر جه ئەرستوو هەتا ئێفلاتوون
دانایانی دەور جه زانا و زەبوون
ئەر گەرەکشا بۆ بنویسا وەسفت
یا کەرا تاریف دڵەی پەڕ ڕحمت
نمەتاوا کەرا وەسفوو سەناو تۆ
ڕۆحی شیرینم یاخود٘ا فێدات بۆ
ئەد٘ا تاریفت کەی بە من کریۆ
شەرتە بۆ ئەشقت جە لام نەبڕیۆ؟
هەتا زوانم بگێڵۆ جه دەم
تا دەسی لەرزۆک بگێرۆ قەڵەم
رۆیە هەزار جار بە دڵ و بە گیان
ماچوو ئەد٘اگیان فێدات بۆ سەیوان
برچسب: مادر,
نویسنده: اشکان زارعینیا