درباره سایت
آخرین مطالب
امکانات وب
زوان
زوان زامی تۆ دڵ ئاوردەن سۆ
یاخوا پیسەۆ دڵ زامت بە سۆ بۆ
زوان چن کەسێت کەردێ بی ئیمان
زوان چن کەسێت کەردێ سەرگەردان
زوان چن زامان کەردی چوون خنجەر
زوان چن کەسان کەردی دەربەدەر
زوان چەن تانەوو تەشەر دای ونەم
زوان چەن شادی شێۆنای چنەم
زوان گوهەر واچ ڕێزەی شەکەر وار
زوان جار جار تاڵ پیسەۆ زهرەمار
زوان چەن ڕۆڵە کەردی جە دایە
چەن ڕەنجی ئاشق تۆ دای بە زایە
حەدیسی سەحێح نەقڵ جە حەزرەت
سالاری مەحشەر شافعی ئۆمەت
نەقڵەن جە ئەسحاب یۆشا فەوتش کەرد
حەزڕەت پەی دەفنش تەشریفش ئاورد
ڕووش کەرد جە ئەسحاب جە دمای تەڵقین
فەرماواش ئامان بە سیدقوو یەقین
بە دستی ڕاستی موبارەکی وێش
گێرتش زوانش بە فیکروو ئەندیش
فەرماواش هۆشتا چینەی بۆ ئامان
نەوزوتا نە گێج نۆقمی گوناهان
زوان تۆخوا درۆ بەر جە یاد
نموونەش مەرگی شیرین پەی فەرهاد
یا بە درۆ هەواڵ مەرگی یوسف دای
عومرێ شکنجەی چەمی یەعقووب دای
هەر ڕۆ پەی ڕیا ڕەنگوو ڕووت واڕات
زوان مێژوو گرد پەڕەن چی کارات
زوان توخوا ئیتر وەسێن وەس
پەی تۆبەی نسووح تازە کەر نەفس
ڕوو کەر نە دەرگایی حەییە لامەکان
بە وردوو ئەۆراد وێنەی سالکان
بە زیکری ئەڵڵا وێت کەرە خەجڵ
بۆە بە دەرمان پەی زامانی دڵ
سەیوان بە شەوو ڕۆ دەس بە دامان
هەر ماچۆ زوان ئامان سەد ئامان
سەیوان _ئێبراهیمی(گواز)
برچسب: زوان,
نویسنده: اشکان زارعینیا