راوچی

دڵ چوون ڕاویار بە یادی جاران
روەش کەرد پاڵنگان ئینجا هەواران

کاڵێن و گۆڵی یا مۆڵگا و ماران
کەرێنێ شیوەن چەنی کۆساران

هانیە و گۆزیبان یا کۆ میشیاو
پێسەو ئازیەتبار پۆشانشا سیاو

هەواروو دەشتێ یا چاڵە حەشان
ڕاوچیان پەی ڕاو کەردەنشا نیشان

چاڵاوێ و گۆڵی هەتا پیازدۆڵ
پەپوو موانۆ یەکسەر بیەن چۆڵ

نمەنەن چەنەش قیژەی قاژی ڕەش
سەیر کەر بێدەنگی ماوای پەچەڕەش

هەوار بە ڕاسی دەردەو گرانەن
باعێس و بانی دەردات ئێنسانەن

شەقەم دا وە باڵ دیسان بە خیاڵ
هەوارەبەرزە و پیرخێر و سەرچاڵ

وینام گرد چۆڵەن هەوار و کۆسار
بە حەسرەت واتم ئەی وەشڵەی بە پار

ناگا دیانی جە سای هەوارێ
وینام ژەرەژیە چەنی چن گوارێ

منشا دیا وێشا دا پەناو گەونیە
نزیکشا کەوتا جە لاو تەوەنیە

وەختیە گۆشم گێرت چێش شیوەنشانەن
ماتی و مەلوولی و کزی بەششانەن

ژەرەژی قاوش کەرد ئەو گواراش
گردیش جەم کەردێ و دایش چێروو باڵاش

واچێ ڕۆڵەگیان خود٘او بێکەسان
هینەو ئێمەیچەن نەک تەنیا یسان

چەنی ژەرەژەێ بە دڵیە خەمبار
کەوتانی پرسیار جە بەرزی کۆسار

پەرسام چێش بیەن دڵ پڕ داخەنی
دووربای پەشێو و بێ دەماخەنی؟

وێت و گوارەکات بە شین و زاری
چی شیوەنتانە چەنی هەواری؟

واتش گۆش گێرە بە زوانی حاڵ
ئێنسان پەی ئێمە بیەن بە زەواڵ

بە دیجامە و دام بەڕەتوو تفەنگ
ژیوایشا پەیما ئاوردەن وە تەنگ

یا کەرا قەفس بەقیە جە وێما
مارانێش وە هەرد پەرێ کوشتەیما

وەڵ جە تلۆعی تەپ مد٘ا سەرما
بە ساچمێ پێکا دڵ و جگەرما

یاکوو بە دامی هەر بە گواری
جیاما کەراوە جە نەو وەهاری

جا وختیە باسی پاڵنگان کریۆ
تەپڵوو فیزیشا عاڵەم مزڕیۆ

ڕاۆچی مەگەر من چننە گۆشتم هەن
دایم پەی کۆشتەیم تۆ عەزمت جەزمەن؟

تلووعوو سۆحی وەڵێ جە شەوەق
تەپ مدەی سەرم تۆ پەی شەڕەبەق

ونیم پژگنی تۆ وە ڕووی کەمەر
کامەن ئێنسافت جە دین بێ خەبر؟

ڕاوچی ویژدانت ئاخر هەن چکۆ
تاوێ جە وەرمی غفڵەت هۆرزە تۆ؟

ڕاوچی تۆ بی خود٘ا جە ڕاو کێشە دەس
ماڕە تاپڕ و ئاوێر دەر قەفس

سرووشت میراسوو گردوو گیانداران
مەکەرەش بێ دەنگ کەش و کۆساران

تۆخود٘ا ئەی برای ڕاوچی چەک بە شان
ئێتر واز بارە تۆ جە سەرکەشان

ڕاوچی وەرش دە ژەرەژی قەفس
شەڕەبەقوو ویار ئێتر وەسێن وەس

هەتا هەواروو سروشت و جوانی
مانا بە وەشی پەی پاڵنگانی

ئاواتم ئانەن وە دڵەی پڕ دەرد
ڕاۆچی بە چەکوە ڕوە نەکەرۆ هەرد

سەیوان کۆتا کەر با نەبۆ زۆخاڵ

هەتا نەسۆتەن پەپوولەی خیاڵ

#سەیوان ئێبراهیمی(گوازی)